१४ साउन, हेटौंडा — बागमती प्रदेश सरकारका तर्फबाट नियुक्त गरिएका तीन मन्त्रीको शपथग्रहण कार्यक्रम अन्तिम समयमा आएर रोकिएको छ। मुख्यमन्त्री बहादुरसिंह लामाले बुधबार बिहान धादिङका गोविन्द लम्साल, चितवनकी माया श्रेष्ठ र गीता गुरूङलाई मन्त्री नियुक्त गरेका थिए। उनीहरूमध्ये लम्साललाई आन्तरिक मामिला तथा कानुन मन्त्रालय, श्रेष्ठलाई युवा तथा खेलकुद मन्त्रालय र गुरूङलाई सहकारी तथा गरिबी निवारण मन्त्रालयको जिम्मेवारी दिइएको थियो।
प्रदेश प्रमुखको कार्यालयमा बिहान ९ बजे शपथग्रहण गराउने तयारी थियो। तीनै मन्त्रीलाई सपथ गराउने सूचना सम्बन्धित कार्यालयलाई दिइसकिएको थियो। तर, अन्तिम समयमा आएर नेकपा एमालेको दबाबका कारण शपथ रोकिएको छ। मुख्यमन्त्री लामा नेतृत्वको सरकारमा सहभागी नेकपा एमालेले वर्तमान राजनीतिक अवस्था संवेदनशील भएको भन्दै मन्त्री नियुक्ति तत्काल नगर्न आग्रह गरेको हो। एमाले संसदीय दलका नेता जगन्नाथ थपलियाले मुख्यमन्त्री लामालाई फोन गरेर सरकार विस्तार रोक्न अनुरोध गरेका थिए।
उनको भनाइमा, यतिखेर मन्त्री नियुक्ति गर्ने कार्यले गलत सन्देश दिन सक्छ, र सरकारभित्रको सहकार्य र सन्तुलनमा समेत असर पर्न सक्छ। एमालेको आग्रहपछि मुख्यमन्त्री लामा अन्योलमा परेका छन् र शपथ कार्यक्रम स्थगित गरिएको हो। यो घटनाले बागमती प्रदेश सरकारभित्र दलहरूबीचको आपसी समन्वय र विश्वासको अवस्था प्रश्नवाचक बनेको देखिन्छ।
