काठमाडौं, साउन १५ – सत्तारुढ प्रमुख दुई दल नेपाली कांग्रेस र नेकपा (एमाले)का शीर्ष नेताहरूबीच बिहीबार दिउँसो प्रधानमन्त्रीको सरकारी निवास बालुवाटारमा भएको छलफल सम्पन्न भएको छ। बैठकमा मुख्यगरी संसदमा विचाराधीन विधेयकहरू र कानुन संशोधनका विषयमा केन्द्रित भएर छलफल भएको जनाइएको छ। यस विषयमा महान्यायाधिवक्ता रमेश बडालसँग पनि परामर्श भएको थियो।
बैठक स्रोतका अनुसार, मन्त्रिपरिषद् हेरफेरको विषयले भने आजको छलफलमा प्रवेश पाएन। ‘आजको बैठकमा मन्त्री हेरफेरको एजेन्डा नै थिएन,’ स्रोतले भन्यो, ‘विधेयकमबारे छलफल गर्नुपर्ने भएकाले महान्यायाधिवक्ता समेतलाई बोलाइएको हो।’ छलफलमा प्रधानमन्त्री केपी शर्मा ओली, कांग्रेस सभापति शेरबहादुर देउवा, उपप्रधानमन्त्री तथा अर्थमन्त्री विष्णु पौडेल, प्रधानमन्त्रीका मुख्य सल्लाहकार विष्णु रिमाल, गृहमन्त्री रमेश लेखक, कांग्रेस उपसभापति पूर्णबहादुर खड्का र महान्यायाधिवक्ता रमेश बडाल सहभागी थिए।
