झापाको मेचीनगर नगरपालिका–९, खुट्टिडाँगीमा एउटा स्कुल भ्यान अनियन्त्रित भई दुर्घटनामा परेको छ। यस दुर्घटनामा चालक, शिक्षक, र विद्यार्थीसहित २१ जना घाइते भएका छन्। शुक्रबार बिहान पारिजात पब्लिक स्कुलको भ्यान (मे १ ज ३१०७) मागुरमाडीबाट स्कुलतर्फ जाँदै गर्दा भित्री सडक खण्डमा दुर्घटना भएको हो। दुर्घटनाको जानकारी पाउनासाथ इलाका प्रहरी कार्यालय धुलाबारीबाट प्रहरी निरीक्षक पाण्डव कुमार राजवंशीको नेतृत्वमा उद्धार टोली खटिएको थियो। प्रहरी र स्थानीयवासीको सहयोगमा घाइतेहरूको तत्काल उद्धार गरी अस्पताल पुर्याइएको छ।
जिल्ला प्रहरी कार्यालय झापाका प्रहरी उपरीक्षक राजन लिम्बुका अनुसार, घाइतेमध्ये तीन जना विद्यार्थीको अवस्था मध्यम रहेको छ भने अन्यको अवस्था सामान्य छ। प्रहरीले गरेको प्रारम्भिक अनुसन्धानमा भ्यान चालकसँग सवारी चालक अनुमतिपत्र रहेको र उनले मदिरा सेवन नगरेको पाइएको छ। तर, भ्यानको प्राविधिक अवस्था कमजोर रहेको देखिएको छ। यस घटनापछि अभिभावकहरूले विद्यालयले प्रयोग गर्ने पुराना र जीर्ण सवारीसाधनले विद्यार्थीको ज्यान जोखिममा पारेको भन्दै आक्रोश व्यक्त गरेका छन्। स्थानीयवासीले विद्यालयका सवारीसाधनको नियमित निरीक्षण, मर्मतसम्भार र चालकको दक्षतामा ध्यान दिन सम्बन्धित निकायको ध्यानाकर्षण गराएका छन्।
