काठमाडौं। शनिबार, १७ साउन २०८२–सडकमा माटो र धुलो खसालेको आरोपमा काठमाडौंको स्वतन्त्र यातायात प्रा. लि. लाई ५० हजार रुपैयाँ जरिवाना गरिएको छ। कलंकी खसी बजार अगाडिको रिङ्गरोड क्षेत्रमा निर्माणाधीन ईभी चार्जिङ्ग स्टेसनको काम गरिरहेको बेला उक्त कम्पनीले सार्वजनिक सडकमा धुलो र माटो फैलाएको थियो। काठमाडौं महानगरपालिका प्रहरी बलले कम्पनीलाई यो जरिवाना तिराएको हो। महानगर प्रहरीका अनुसार, यस कार्यले सार्वजनिक सडकमा माटो र धुलो फैलिएर पैदलयात्री तथा सवारीसाधनलाई आवतजावत गर्न असहज भएको थियो।
यसका साथै, महानगरपालिकाले यस कार्यलाई वातावरणीय मापदण्डको उल्लङ्घन भएको ठहर गरेको छ। कम्पनीले निर्माण सामग्री तथा फोहोर व्यवस्थापनमा लापरबाही गर्दा सडकमा प्रदूषण फैलिएको भन्दै यो जरिवाना गरिएको हो। सार्वजनिक स्थानमा हुने यस्ता लापरबाहीले जनस्वास्थ्य र वातावरणमा नकारात्मक असर पर्ने भएकाले महानगरपालिकाले यसलाई कडाइका साथ नियन्त्रण गर्ने नीति लिएको छ। यो जरिवाना सोही नीतिको एक हिस्सा रहेको बताइएको छ।
