सिन्धुपाल्चोक । निरन्तरको वर्षासँगै सिन्धुपाल्चोकको मेलम्ची नदीमा जलसतहले सतर्कताको तह पार गरेको छ, जसले गर्दा तटीय क्षेत्रका बासिन्दाहरूमा त्रास बढेको छ । बाढी पूर्वानुमान महाशाखाले नदीको नाकोटे जलमापन केन्द्रको तथ्याङ्कलाई उद्धृत गर्दै जलस्तर बढ्दो क्रममा रहेको जानकारी दिएको छ र सम्भावित जोखिमबाट बच्न उच्च सतर्कता अपनाउन आग्रह गरेको छ । हाल देशभर मनसुनी वायुको प्रभाव रहेको छ। मनसुनको न्यून चापीय रेखा सरदर स्थानको केही उत्तरतर्फ अवस्थित रहेकाले देशका विभिन्न भागमा हल्कादेखि मध्यम वर्षा भइरहेको छ ।
कोशी, बागमती, गण्डकी, लुम्बिनी, कर्णाली, सुदूरपश्चिम र मधेश प्रदेशका थोरै स्थानहरूमा भइरहेको वर्षाले पहाडी क्षेत्रमा पहिरो र नदीहरूमा जलस्तर वृद्धि गराएको छ । विशेषगरी, मेलम्ची नदी क्षेत्रमा सन् २०२१ मा आएको भयानक बाढीले ठूलो जनधनको क्षति पुर्याएको थियो । यस वर्ष पनि मनसुनको सुरुवातसँगै नदीको बहावमा वृद्धि हुन थालेपछि स्थानीयवासीहरू त्रसित भएका छन् । नदीमा पानीको बहाव बढ्नुका साथै भिरालो र कमजोर जमिनमा पहिरो जाने जोखिम पनि बढेको छ । यस अवस्थामा बाढी पूर्वानुमान महाशाखाले नदी किनारमा बसोबास गर्ने, यातायात गर्ने र अन्य काममा संलग्न सबैलाई विशेष सावधानी अपनाउन अनुरोध गरेको छ ।
मेलम्ची नगरपालिका र आसपासका स्थानीय तहहरूले सम्भावित जोखिमलाई मध्यनजर गर्दै पूर्वतयारी थालेका छन् । स्थानीय प्रशासनले विपद् व्यवस्थापनका लागि सुरक्षा निकायसँग समन्वय गरिरहेको छ । प्रहरी, सशस्त्र प्रहरी र स्थानीय स्वयंसेवकहरूको टोलीलाई उच्च सतर्कतामा राखिएको छ । मौसमविद्हरूका अनुसार मनसुन सक्रिय रहेकाले आगामी केही दिनसम्म वर्षा जारी रहने सम्भावना छ । यसले गर्दा मेलम्ची मात्र नभई देशका अन्य ठूला नदीहरूमा पनि जलस्तर बढ्न सक्ने सम्भावना छ। यसर्थ, सम्पूर्ण देशवासीलाई मौसमको जानकारी लिइरहने र जोखिमपूर्ण क्षेत्रहरूमा नबस्न वा यात्रा नगर्न आग्रह गरिएको छ ।
