तनहुँ । नारायणगढबाट गोरखातर्फ जाँदै गरेको यात्रुवाहक बस आज दिउँसो तनहुँको आँबुखैरेनी गाउँपालिका-२ स्थित ऐनापहरामा दुर्घटनामा परेको छ । अनियन्त्रित भई सडकबाट तल खसेर मर्स्याङ्दी नदीमा पुगेको उक्त बस दुर्घटनामा पाँच जना यात्रु घाइते भएका छन् ।दुर्घटनालगत्तै स्थानीय बासिन्दा, नेपाल प्रहरी र सशस्त्र प्रहरीको टोली उद्धार कार्यमा खटिएका थिए । घाइते पाँच जनालाई तत्कालै उद्धार गरी नजिकैको आँबुखैरेनी अस्पतालमा पुर्याइएको जिल्ला प्रहरी कार्यालयले जनाएको छ । घाइतेमध्ये दुई जनाको अवस्था गम्भीर रहेकाले उनीहरूलाई थप उपचारका लागि चितवनस्थित भरतपुर अस्पतालमा रेफर गरिएको छ । अन्य तीन जना घाइतेको अवस्था सामान्य रहेको र उनीहरूको आँबुखैरेनी अस्पतालमै उपचार भइरहेको छ ।
सशस्त्र प्रहरी बलका सहायक प्रवक्ता डीएसपी शैलेन्द्र थापाका अनुसार, दुर्घटनाको खबर प्राप्त भएपछि सशस्त्र प्रहरी बल विपद् व्यवस्थापन तालिम शिक्षालय कुरिनटार र नम्बर २३ मनकामना गण तनहुँबाट तत्कालै उद्धार टोली घटनास्थलमा परिचालन गरिएको थियो । सशस्त्र प्रहरीको टोलीले स्थानीय प्रशासनसँगको समन्वयमा घाइतेहरूको उद्धार कार्यलाई तीव्र बनाएको थियो ।
प्रहरीका अनुसार बा२ ख १०७७ नम्बरको उक्त बस सडकबाट तल खसेको हो । तर, दुर्घटनाको यकिन कारण भने खुलिसकेको छैन । तीव्र गति, चालकको लापरबाही वा सडकको अवस्थाका कारण दुर्घटना भएको हुनसक्ने अनुमान गरिएको छ । प्रहरीले घटनाबारे थप अनुसन्धान गरिरहेको छ । मनसुनी वर्षाका कारण सडक चिप्लो भएको र पहाडी क्षेत्रमा यस्ता दुर्घटनाको जोखिम बढी हुने हुँदा सावधानी अपनाउन प्रहरीले आग्रह गरेको छ ।
