काठमाडौं : १ करोड ४८ लाखभन्दा बढी रकमको अभौतिक मुद्रा (क्रप्टो करेन्सी)को कारोबार गर्ने युवक पक्राउ परेका छन् । पक्राउ पर्नेमा भक्तपुरको मध्यपुर ठिमी नगरपालिका-५ का २५ वर्षीय मुकेश प्रजापति रहेका छन् ।
जिल्ला प्रहरी परिसर काठमाडौंका अनुसार उनले विभिन्न सामाजिक सञ्जालको प्रयोग गरी मानिसहरूलाई प्रलोभन देखाई ठगी गरेको रकमलाई अभौतिक मुद्रामा साटी कारोबार गर्ने गरेका थिए । परिसरबाट खटिएको प्रहरी टोलीले बिहीबार दिउँसो साढे २ बजे काठमाडौंको माइतीघरबाट उनलाई पक्राउ गरेको हो । काठमाडौं जिल्ला अदालतबाट ५ दिनको म्याद थप गरेर अनुसन्धान भइरहेको परिसरका प्रवक्ता एवं प्रहरी उपरीक्षक पवन कुमार भट्टराईले जनकारी दिए ।
उनले हालसम्म एक करोड ४८ लाख ७६ हजार ५२७ रुपैयाँ बराबरको अभौतिक मुद्राको कारोबार गरेको देखिएको छ । अभौतिक मुद्रा कारोबार गर्ने विभिन्न खाताहरूमा ११ लाख ४१ हजार ९८३ रुपैयाँ मौज्दात रहेको अनुसन्धानका क्रममा खुलेको उनले बताए ।
