काठमाडौं : फिफा विश्वकप २०२६ अन्तर्गत पहिलो सेमिफाइनलमा मंगलबार राति विश्व फुटबलका दुई महाशक्ति फ्रान्स र स्पेन आमनेसामने हुँदैछन् । अमेरिकाको टेक्सासस्थित डालास स्टेडियममा हुने यो भिडन्तमा दुवै टोलीको लक्ष्य स्पष्ट छ, फाइनलमा स्थान सुरक्षित गर्दै विश्वकप उपाधितर्फ एक कदम थप नजिक पुग्ने । विश्व फुटबलमा फरक शैलीका लागि परिचित यी दुई टोलीको भेटलाई यस संस्करणकै सबैभन्दा आकर्षक प्रतिस्पर्धामध्ये एक मानिएको छ। फ्रान्स व्यक्तिगत प्रतिभा, तीव्र काउन्टर अट्याक र आक्रामक फुटबलमा विश्वास गर्छ भने स्पेन बल नियन्त्रण, छोटो पास र धैर्यपूर्ण खेल शैलीले परिचित छ। त्यसैले यो खेल केवल दुई टोलीबीचको प्रतिस्पर्धा मात्र होइन, दुई फरक फुटबल दर्शनबीचको भिडन्तसमेत हुनेछ। फ्रान्सले यस विश्वकपमा आफ्नो दाबेदारी लगातार प्रमाणित गर्दै आएको छ। नकआउट चरणमा स्विडेन, पराग्वे र मोरक्कोलाई हराउँदै सेमिफाइनल यात्रा तय गरेको फ्रान्स आत्मविश्वासले भरिएको छ।
प्रशिक्षकले अनुभवी र युवा खेलाडीबीच उत्कृष्ट सन्तुलन मिलाएका छन् । टोलीको सबैभन्दा ठूलो भरोसा कप्तान किलियन एमबाप्पे हुन् । प्रतियोगिताभर निरन्तर गोल गरिरहेका एमबाप्पे गोल्डेन बुटको प्रमुख दाबेदार समेत बनेका छन् । उनको गति, निर्णायक क्षणमा खेलको दिशा बदल्ने सामथ्र्य स्पेनका लागि सबैभन्दा ठूलो चुनौती हुनेछ । एमबाप्पेलाई ओस्मान डेम्बेले, एडुआर्डो कामाभिङ्गा, औरेलियन चुआमेनी तथा विलियम सालिबाजस्ता खेलाडीले राम्रो साथ दिइरहेका छन् । फ्रान्सको रक्षापंक्ति पनि अहिलेसम्म निकै व्यवस्थित देखिएको छ। विशेषगरी नकआउट चरणमा टोलीले विपक्षीलाई सीमित अवसर मात्रै दिएको छ ।
स्पेन पनि उत्कृष्ट लयमा छ । समूह चरणदेखि नै आकर्षक प्रदर्शन गर्दै आएको टोलीले नकआउट चरणमा अस्ट्रिया, पोर्चुगल र बेल्जियमलाई हराएर अन्तिम चारमा स्थान बनाएको हो । स्पेनको सबैभन्दा ठूलो शक्ति भनेकै मिडफिल्ड हो । बलमाथि लामो समय नियन्त्रण राख्ने, खेलको गति आफूअनुकूल बनाउने र विपक्षीलाई थकाउने शैलीमा स्पेन अहिले पनि विश्वकै उत्कृष्ट टोलीमध्ये एक मानिन्छ । स्पेनको आक्रमणमा मिकेल ओयारजाबाल, निको विलियम्स र लामिन यमलजस्ता खेलाडीले निरन्तर प्रभाव छोडिरहेका छन् । मिडफिल्डमा पेड्री र रोड्रीको जोडीले टोलीलाई सन्तुलित बनाएको छ । बल नियन्त्रणसँगै छिटो आक्रमणमा रूपान्तरण गर्ने क्षमता स्पेनको मुख्य हतियार बनेको छ ।
यस खेलमा दुवै टोलीबीचको व्यक्तिगत प्रतिस्पर्धा पनि उत्तिकै रोचक हुनेछ। एकातिर एमबाप्पेको तीव्र गति रोक्ने चुनौती स्पेनको रक्षापंक्तिमा हुनेछ भने अर्कोतर्फ स्पेनका युवा आक्रमणकारीलाई नियन्त्रण गर्नु फ्रान्सका डिफेन्डरका लागि सजिलो हुने छैन। मध्यपंक्तिको नियन्त्रण जसले लिन्छ, उसैले खेलको लय निर्धारण गर्ने सम्भावना धेरै छ ।
विश्वकप इतिहासमा फ्रान्स र स्पेनबीच भएका भेटहरू पनि प्रतिस्पर्धात्मक रहँदै आएका छन् । दुवै टोली विश्व फुटबलका पूर्व विश्वविजेता हुन् । फ्रान्सले १९९८ र २०१८ मा विश्वकप जितेको थियो भने स्पेनले २०१० मा पहिलो पटक उपाधि उचालेको थियो। त्यसैले दुवैसँग ठूलो प्रतियोगिताको अनुभव र दबाब सम्हाल्ने क्षमता प्रशस्त छ ।
