११ जेठ, तनहुँ — पृथ्वी राजमार्ग अन्तर्गत तनहुँको व्यास नगरपालिकाको वडा नम्बर ३ र ४ जोड्ने मादी नदीमा शनिबार राति करिब साढे ११ बजे एक जिप दुर्घटना हुँदा तीन जनाको मृत्यु भएको छ। दमौलीबाट चापाघाटतर्फ जाँदै गरेको ग २ च ५७६० नम्बरको जिप मादी नदी पुलको रेलिङ भत्काएर नदीमा खसेको जिल्ला प्रहरी कार्यालय तनहुँले जनाएको छ।
मृत्यु हुनेहरूमा व्यास नगरपालिका–५ का कुशल मगर, प्रविन मगर र कुमार मगर रहेका छन्। यस्तै, दुर्घटनामा परेका चालक रोहित गुट्टा र धिरज रौनिहार घाइते भएका छन्। घाइतेमध्ये धिरज रौनिहारलाई दमौली अस्पतालमा प्राथमिक उपचारपछि पोखरा रिफर गरिएको छ भने चालक रोहित गुट्टाको दमौली अस्पतालमै उपचार भइरहेको प्रहरीले जनाएको छ। जिपमा कुल पाँच जना यात्रु सवार थिए। दुर्घटनाको कारणबारे अनुसन्धान भइरहेको छ।
