रूपन्देहीको लुम्बिनी सांस्कृतिक नगरपालिका वडा नं. ११ जितवापुरमा दुई समूहका युवाबीच भएको कुटाकुटमा एकजना घाइते भएका छन्। जितवापुरमा जेठ २ गतेदेखि चलिरहेको महायज्ञमा रहेका युवाहरु र मोहसड गाउँबाट आएका युवाहरुबीच शनिबार राति करिब १२ बजे विवाद बढ्दा कुटाकुट भएको जिल्ला प्रहरी कार्यालय रुपन्देहीका प्रमुख प्रहरी उपरीक्षक प्रदीप क्षेत्रीले जानकारी दिएका छन्। महायज्ञस्थलमा मोहसडका केही युवाहरु रातिको समयमा आएर विवाद उत्पन्न गर्दै आएका थिए। शनिबार राति पनि विवाद भएपछि दुई समूहबीच हाताहाति भएको र स्थानीय विक्रम सिंह घाइते भएका हुन्।
विक्रमको हातखुट्टामा चोट लागेको छ र उनी भैरहवास्थित भिम अस्पतालमा उपचाररत छन्। कुटाकुटपछि इलाका प्रहरी कार्यालय लुम्बिनीको टोलीले दुई जनालाई पक्राउ गरेको छ। पक्राउ पर्नेहरु मोहसडका २७ वर्षीय कमरउद्धिन मुसलमान र २६ वर्षीय रोशन अली फकिर रहेका छन्। प्रहरी उपरिक्षक क्षेत्रीका अनुसार पक्राउ परेकाहरुको साथबाट गोली नभएको एक थान कटुवा पेस्तोल बरामद गरिएको छ। उनीहरुलाई इलाका प्रहरी कार्यालय लुम्बिनीमा राखेर थप अनुसन्धान भइरहेको छ।
