काठमाडौँ । प्रधानमन्त्री तथा एमाले अध्यक्ष केपी शर्मा ओली र नेपाली कांग्रेसका सभापति शेरबहादुर देउवासहित सत्तारुढ दलका नेताहरुबीच संसद् बैठक अघि महत्वपूर्ण छलफल सम्पन्न भएको छ। बालुवाटारस्थित प्रधानमन्त्रीको सरकारी निवासमा भएको छलफलमा आज बस्ने प्रतिनिधिसभा बैठकमा उठेका विषयमा गृहमन्त्री रमेश लेखकले संसद्मा प्रस्ट पार्ने सहमति भएको छ।
विपक्षी दलले सदन अवरुद्ध गर्ने नीति लिएको अवस्थामा प्रधानमन्त्री ओली, सभापति देउवा, गृहमन्त्री लेखक, कांग्रेस उपसभापति पुर्णबहादुर खड्का, कांग्रेस प्रमुख सचेतक श्याम घिमिरे र एमाले प्रमुख सचेतक महेश बर्तौलाले छलफल गरेका थिए। एमालेका प्रमुख सचेतक महेश बर्तौलाले बालुवाटारमा संसद्को गतिरोध खुलाउने विषयमा छलफल भएको बताए। उनले भने, “उठेका विषयमा आजको संसद् बैठकमा गृहमन्त्रीले प्रस्ट पार्नुहुनेछ र नियमावलीअनुसार बैठक अघि बढ्नेछ।” यसअघि मंगलबारको संसद् बैठक विपक्षीको अनुरोधमा स्थगित गरिएको थियो।
