१४ जेठ, काठमाडौं — सरकारले बिहीबार संघीय संसद्को संयुक्त बैठकमार्फत आगामी आर्थिक वर्ष २०८२/०८३ को बजेट प्रस्तुत गर्ने भएको छ। अर्थमन्त्री विष्णु पौडेलले दिउँसो ३ बजे बजेट सार्वजनिक गर्ने कार्यक्रम तय भएको हो। संघीय संसद् सचिवालयले बैठक भोलि दिउँसो १:४५ बजेका लागि आह्वान गरेको छ। पछिल्ला दिनमा भिजिट भिसा प्रकरणमा गृहमन्त्रीको राजीनामाको माग गर्दै सदन अवरुद्ध गर्दै आएका विपक्षी दलहरूले बजेट प्रस्तुतिमा अवरोध नगर्ने निर्णय गरेका छन्।
यससँगै, निर्धारित समयमै बजेट सार्वजनिक हुने मार्ग खुला भएको छ। आगामी बजेटमा आर्थिक वृद्धि, राजस्व संकलन, विकास खर्चको प्रभावकारी व्यवस्थापन, ऋणमा निर्भरता घटाउने, रोजगारी सिर्जना तथा सामाजिक सुरक्षा जस्ता विषयमा प्राथमिकता दिइने अपेक्षा गरिएको छ।
