काठमाडौँ — नेपाल कम्युनिष्ट पार्टी (एमाले) का महान नेता मदनकुमार भण्डारी र जीवराज आश्रितको ३२ औं स्मृति दिवस आज देशभर विविध कार्यक्रम गरी मनाइँदैछ। प्रधानमन्त्री तथा एमाले अध्यक्ष केपी शर्मा ओलीको प्रमुख आतिथ्यतामा मदन नगर बल्खुस्थित मदन भण्डारीको प्रतिमामा माल्यार्पण गर्दै स्मृतिसभा आयोजना गरिएको छ। एमालेका पोलिटब्युरो सदस्य कृष्णगोपाल श्रेष्ठका अनुसार बल्खुमा एमालेको केन्द्रीय कार्यालय स्थापना गर्न मदन भण्डारीले मुख्य भूमिका निर्वाह गरेका थिए।
विसं २०४६ सालको जनआन्दोलन सफलतापछि तत्कालीन नेकपाले राजधानीको बागबजारमा नेकपाका संस्थापक नेता नारायणविलास जोशीको घरमा केन्द्रीय कार्यालय स्थापना गरेको थियो। पछि त्यो कार्यालय बल्खुमा सारिएको थियो। २०७२ सालको भूकम्पका कारण कार्यालयमा ठूलो क्षति पुगेपछि त्यो कार्यालय भत्काएर नयाँ ठाउँमा सरेको थियो। सो परिसरको बीचमा मदन भण्डारीको प्रतिमा राखिएको छ। त्यसपछि एमालेको कार्यालय कहिले धूम्रबाराही त कहिले थापाथली सारिँदै हाल च्यासलस्थित तुल्सीलाल स्मृति प्रतिष्ठानमा रहेको छ। मदन–आश्रित स्मृति दिवसमा बल्खुस्थित पुरानो कार्यालय र त्यहाँको मदन भण्डारीको प्रतिमाले विशेष महत्व पाउँछन्
