सोलुखुम्बु, ३ जेठ— गृहमन्त्री रमेश लेखकले आज सगरमाथा आधार शिविर क्षेत्रको निरीक्षण गरेका छन्। पर्यटकीय सिजन नजिकिँदै गर्दा आरोहीहरूको अवस्था र शान्ति सुरक्षाको प्रत्यक्ष अवलोकन गर्न उनी खुम्बु पासाङल्हामु गाउँपालिका–४ स्थित आधार शिविर पुगेका थिए। गृहमन्त्री लेखकले सगरमाथा क्षेत्रमा उद्धार, पर्वतारोहण सहयोग र पर्यटकहरूको सहजताका लागि हेलिकप्टर उडानलाई सहज र प्रभावकारी बनाउन सरकारले सक्रिय भूमिका खेल्ने बताए। उनले शारीरिक रूपमा कमजोर वा दुर्घटनामा परेका पर्यटकको उद्धारका लागि हेलिकप्टर अत्यावश्यक रहेको उल्लेख गर्दै, “सरकार हेलिकप्टर उडानमा रोक लगाउने होइन, अनावश्यक र अव्यवस्थित उडानलाई नियमन गर्नेछ,” भने।
सगरमाथा क्षेत्रमा उद्धार बाहेकका हेलिकप्टर उडान रोक्नुपर्ने स्थानीय माग लामो समयदेखि उठ्दै आएको छ। खुम्बु पासाङल्हामु गाउँपालिकाले हेलिकप्टरको दुरुपयोग हुन नदिन नियमित उडानमा प्रतिबन्धको आग्रह गर्दै आएको छ। तर, पर्यटक व्यवसायीहरूले अत्यधिक प्रतिबन्धले व्यवसायमा नकारात्मक प्रभाव पर्ने भन्दै नियमनसहित स्वतन्त्र उडानको पक्षमा छन्। गृहमन्त्री लेखकले प्रधानमन्त्री केपी शर्मा ओली पनि सगरमाथा क्षेत्रमा देखिएका समस्या बारे जानकारी राखेको र समस्याको समाधानका लागि ‘सगरमाथा संवाद’ कार्यक्रम सञ्चालन भइरहेको बताए।
