काठमाडौं — हाल देशभर पश्चिमी वायु र स्थानीय वायुको प्रभाव रहँदा बंगालको खाडी र अरब सागरबाट आएको जलवाष्पयुक्त हावाको आंशिक प्रभाव पनि रहेको छ। जल तथा मौसम पूर्वानुमान महाशाखाले यही जानकारी सार्वजनिक गरेको छ। पछिल्लो एक घन्टामा कोशी, मधेस, बागमती, गण्डकी र कर्णाली प्रदेशका एक-दुई स्थानमा छिटपुट वर्षा भएको रेकर्ड गरिएको छ। शुक्रबार बेलुका हावाहुरीसहितको वर्षाले विभिन्न भूभागमा मानवीय तथा भौतिक क्षति पुर्याएको थियो।
पछिल्लो चौबीस घन्टामा देशका अधिकांश भूभागमा वर्षा भएको छ भने शनिवार दिउँसो कोशी, बागमती, गण्डकी र लुम्बिनी प्रदेशका पहाडी भू-भागहरूमा आंशिकदेखि सामान्य बदली रहनेछ। बाँकी भू-भागमा मुख्यतः सफा वा आंशिक बदली रहने अनुमान छ। कोशी, बागमती, गण्डकी, लुम्बिनी लगायतका पहाडी क्षेत्रका थोरै स्थानहरूमा मेघगर्जन र चट्याङ्गसहित हल्का देखि मध्यम वर्षा हुन सक्ने सम्भावना छ। उच्च पहाडी र हिमाली क्षेत्रका केही स्थानमा हल्का वर्षा वा हिमपात हुनसक्ने महाशाखाले जनाएको छ। जलवायु परिवर्तन र मौसमी प्रभावका कारण कतिपय स्थानमा दैनिक जनजीवन, कृषि, स्वास्थ्य, सडक र हवाई यातायातमा समस्या आउन सक्ने भएकाले महाशाखाले सतर्कता अपनाउन र आवश्यक तयारी गर्न आग्रह गरेको छ ।
