४ जेठ, काठमाडौं — काठमाडौं उपत्यका लगायत विभिन्न जिल्लामा पानी परिरहेको छ । जल तथा मौसम विज्ञान विभागका अनुसार हाल कोशी, मधेश, बागमती, गण्डकी र लुम्बिनी प्रदेशका धेरै जिल्लामा वर्षा भइरहेको छ । विशेषगरी काठमाडौं उपत्यका, सर्लाही, उदयपुर, ओखलढुङ्गा, सिन्धुपाल्चोक र गुल्मी जिल्लामा वर्षासँगै चट्याङ परेकोले सतर्क रहन मौसम पूर्वानुमान महाशाखाले आग्रह गरेको छ । एक घण्टामा सबैभन्दा बढी वर्षा काठमाडौंको पानीपोखरी क्षेत्रमा रेकर्ड गरिएको छ, जहाँ ३५.४ मिलिमिटर पानी परेको छ । त्यसपछि काभ्रेको खोपासी (पनौती) क्षेत्रमा १० मिलिमिटर वर्षा भएको छ ।
गत १२ घण्टामा सबैभन्दा धेरै वर्षा स्याङ्जामा रेकर्ड गरिएको छ, जहाँ १०७ मिलिमिटर पानी परेको विभागले जनाएको छ । यद्यपि कर्णाली र सुदूरपश्चिम प्रदेशका जिल्लामा भने फाटफुट्ट वर्षा मात्र भएको छ । हाल देशभरि पश्चिमी वायु र स्थानीय वायुको प्रभाव छ । साथै बंगालको खाडी र अरब सागरबाट आएको जलवाष्पयुक्त हावाको आंशिक प्रभावले वर्षा भइरहेको मौसमविद्हरूले बताएका छन् । अत: सबैलाई आवश्यक सतर्कता अपनाउन विभागले अनुरोध गरेको छ ।
