५ जेठ, काठमाडौँ । म्याग्दीको रघुगंगा गाउँपालिका–३ स्थित कालीगण्डकी नदीमा पौडी खेल्ने क्रममा बेपत्ता भएका एक किशोरको शव सशस्त्र प्रहरी बलको गोताखोर टोलीले सोमबार फेला पारेको छ। सोही स्थानका १५ वर्षीय निरज मल्ल जेठ ३ गते दिउँसो नदीमा पौडी खेल्ने क्रममा अचानक डुबेर बेपत्ता भएका थिए। परिवार र स्थानीयको जानकारीपछि सुरु गरिएको खोजी अभियान अन्तर्गत सशस्त्र प्रहरी बल नेपाल नं. २४ कालिका गण, कास्कीबाट खटिएको विशेष टोलीले उनलाई सोमबार दिउँसो करिब १५ फिट गहिराइमा डुबेको अवस्थामा फेला पारेको हो।
सशस्त्र प्रहरी बलका सह-प्रवक्ता डीएसपी शैलेन्द्र थापाका अनुसार, खोजी कार्यका लागि गणबाट ४ जना प्रशिक्षित गोताखोर र ५ जना विपद् व्यवस्थापन तालिम प्राप्तसहित कुल १९ जनाको टोली सोमबार बिहानै घटनास्थलमा परिचालन गरिएको थियो। घटनास्थल दुर्गम र नदीको बहाव तीव्र भए पनि तालिमप्राप्त टोलीले सूचित समयमै शव निकाल्न सफल भएको हो। किशोरको शव आवश्यक कानुनी प्रक्रिया पूरा गरी परिवारको जिम्मा लगाउने तयारी भइरहेको स्थानीय प्रशासनले जनाएको छ। यस घटनाले गर्मीयाममा नदी तथा खोलामा पौडी खेल्दा आवश्यक सतर्कता नअपनाउँदा हुन सक्ने जोखिमप्रति सबैलाई सचेत गराएको छ।
