काठमाडौं, ६ जेठ — राष्ट्रिय स्वतन्त्र पार्टी (रास्वपा) सभापति तथा पूर्वगृहमन्त्री रवि लामिछानेको बन्दीप्रत्यक्षीकरणसम्बन्धी रिट निवेदनमाथि सर्वोच्च अदालतमा सुनुवाइ सुरु भए पनि टुंगो लाग्न सकेन। मंगलबार न्यायाधीशद्वय नहकुल सुवेदी र बालकृष्ण ढकालको इजलासमा प्रारम्भ भएको सुनुवाइ नसकिएकाले रिट ‘हेर्दाहेर्दै’मा राखिएको हो। लामिछानेकी पत्नी निकिता पौडेलले गत वैशाख ७ गते सर्वोच्च अदालतमा बन्दीप्रत्यक्षीकरणको रिट दर्ता गराएकी थिइन्।
तर यो रिट यसअघि ६ पटकसम्म ‘हेर्न नमिल्ने’मा परेको थियो। मंगलबार सातौं प्रयासमा बल्ल सुनुवाइ सुरु भएको हो। उक्त रिटमा लामिछानेले उच्च अदालत तुलसीपुर, बुटवल इजलासद्वारा गरिएको थुनासम्बन्धी आदेशविरुद्ध चुनौती दिएका हुन्। उच्च अदालतले जिल्ला अदालत रुपन्देहीको थुनामुक्त गर्ने आदेश उल्ट्याउँदै चैत २२ गते लामिछानेलाई पुर्पक्षका लागि थुनामा पठाउने निर्णय गरेको थियो। हाल रवि लामिछाने पुर्पक्ष थुनामा रुपन्देही कारागारमा रहेका छन्। अदालतले अन्तिम निर्णय नहुँदासम्म कानुनी लडाइँ जारी रहने देखिएको छ।
