काठमाडौं, ७ जेठ। जिल्ला प्रहरी परिसर काठमाडौंको मुख्य गेटबाटै थुनुवा फरार भएको घटना सार्वजनिक भएको छ। प्रहरी वृत्त स्वयम्भुबाट मुद्दाको अनुसन्धानका लागि जिल्ला प्रहरी परिसर भद्रकाली ल्याइएका २४ वर्षीय निशान परियार सोमबार परिसरको गेटबाट भागेका हुन्। परियार अभद्र व्यवहारसम्बन्धी कसुरमा पक्राउ परेका थिए। उनलाई प्रहरी वृत्त स्वयम्भुबाट आवश्यक कानुनी प्रक्रिया र बयानका लागि भद्रकालीस्थित परिसर ल्याइएको थियो। तर परिसरको गेट नजिकै पुगेकै बेला उनी प्रहरीको निगरानी कमजोर पारेकाे मौका छोप्दै फरार भएका हुन्।
जिल्ला प्रहरी परिसर, काठमाडौंका एक वरिष्ठ अधिकृतका अनुसार फरार अभियुक्त परियारको खोजीका लागि प्रहरीको विशेष टोली परिचालन गरिएको छ। “उनी कस्तो अवस्थामा र कसरी भागे भन्ने विषयमा पनि अनुसन्धान सुरु भइसकेको छ,” ती अधिकृतले रातोपाटीसँग भने, “थुनुवा भाग्न सफल हुनु स्वयं सुरक्षा व्यवस्थामै गम्भीर प्रश्न हो, यस विषयमा आन्तरिक कारबाही प्रक्रिया पनि अघि बढाइएको छ।” थुनुवा फरार भएको विषयले प्रहरीको निगरानी प्रणालीप्रति प्रश्न उठाएको छ।
घटनालाई लिएर प्रहरी वृत्त स्वयम्भु र परिसर भद्रकाली दुवैतर्फ सुरक्षा व्यवस्थामा कमजोरी भएको आशंका गरिएको छ। फरार थुनुवा परियारकाे स्थायी ठेगाना र सम्भावित सम्पर्क ठाउँहरूमा निगरानी बढाइएको प्रहरीले जनाएको छ। यता, स्थानीयवासीले समेत प्रहरी प्रशासनलाई सुरक्षा संवेदनशीलताप्रति बढी सतर्क बन्न आग्रह गरेका छन्। अभियुक्त फरार भएपछिको अवस्था नियन्त्रणमा ल्याउन प्रहरीले सिसिटिभी फुटेज विश्लेषण गर्ने, सूचना संकलन तीव्र पार्ने र आवश्यक परेमा सार्वजनिक सूचना जारी गर्ने तयारी गरिरहेको छ
