काठमाडौं, ७ जेठ। दक्षिण कोरिया पठाइदिन्छु भन्दै तीन जनाबाट लाखौं रुपैयाँ ठगी गरेको अभियोगमा एक युवक काठमाडौंबाट पक्राउ परेका छन्। पक्राउ पर्नेमा कागेश्वरी मनोहरा नगरपालिका–१६, पेप्सीकोलामा बस्दै आएका सुनसरी इनरुवा नगरपालिका–७ निवासी ३२ वर्षीय रमेश कुमार यादव रहेका छन्। उनीमाथि आकर्षक तलबको लोभ देखाई वैदेशिक रोजगारीका नाममा ३ जना पीडितहरूबाट २६ लाख ८० हजार रुपैयाँ असुलेर सम्पर्कविहीन भएको आरोप लागेको छ।
पीडितहरूले दिएको जाहेरीको आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरी टोलीले यादवलाई पेप्सीकोलाबाट मंगलबार नियन्त्रणमा लिएको हो। पक्राउ परेका यादवलाई वैदेशिक रोजगारसम्बन्धी आवश्यक अनुसन्धान र कानुनी कारबाहीको प्रक्रिया अघि बढाउन वैदेशिक रोजगार विभाग, ताहाचल काठमाडौंमा पठाइएको प्रहरीले जानकारी दिएको छ। प्रहरीका अनुसार यादवले वैदेशिक रोजगारीका लागि कोरिया पठाइदिने भन्दै विश्वास जितेका थिए तर पैसा लिएपछि सम्पर्क तोडेका थिए। यस्ता ठगीका घटनाहरू दोहोरिन नदिन प्रहरीले सचेत रहन र कुनै पनि रकम बुझाउनु अघि प्रामाणिक प्रक्रिया अपनाउन नागरिकहरूलाई आग्रह गरेको छ
