काठमाडौँ, १९ जेठ। भिजिट भिसा प्रकरणमा मुछिएका गृहमन्त्री रमेश लेखकको राजीनामा नआएसम्म संसद् बैठक अघि बढ्न नसक्ने अडान नेकपा माओवादी केन्द्रले दोहोर्याएको छ। प्रधानमन्त्री केपी शर्मा ओलीको पहलमा सिंहदरबारमा बसेको तीन प्रमुख दलका शीर्ष नेताहरूको बैठकमा माओवादी केन्द्रले पुरानै माग दोहोर्याएको हो। बैठकमा सहभागी प्रमुख प्रतिपक्षी दलका प्रमुख सचेतक हितराज पाण्डेले संसद् अवरोध हटाउने सन्दर्भमा आफूहरूको धारणा स्पष्ट रहेको बताए।
‘प्रधानमन्त्रीसहित सत्तापक्षले संसद् खुलाउन आग्रह गर्नुभयो, गृहमन्त्रीले पनि राजीनामा होइन, संसद् खोल्नुपर्छ भन्नुभयो,’ पाण्डेले भने, ‘तर हामीले सुशासन र जवाफदेहिताको पक्षमा अडिग रहेर गृहमन्त्रीको राजीनामा आवश्यक रहेको धारणा राख्यौं।’ उनका अनुसार माओवादी केन्द्रले संसद्मा उठाएको विषयवस्तु भिजिट भिसा प्रकरणमै केन्द्रित रहेको छ, र त्यसमा भएको अनियमितताको निष्पक्ष छानबिन सुनिश्चित गर्न गृहमन्त्रीले मार्ग प्रशस्त गर्नुपर्ने माग दोहोर्याइएको छ। ‘यस्तो अवस्था समाधानको बाटो भनेकै गृहमन्त्रीको राजीनामा हो,’ उनले स्पष्ट पारे।
सत्तापक्षको तर्फबाट भने यो प्रकरण प्रशासनिक तहको रहेको र मन्त्रीको राजीनामा आवश्यक नरहेको भनिएको छ। तर माओवादी केन्द्रले यो विषयलाई केवल कर्मचारी तहको गल्तीमा सीमित गर्न नमिल्ने बताउँदै संसद् अवरोध हटाउने सन्दर्भमा थप दबाब बनाएको छ।
